1. Aspiranturaya ali təhsil haqqında diplomu olan (bakalavr diplomu istisna olmaqla) Azərbaycan Respublikasının vətəndaşları qəbul olunurlar.

2. Xarici ölkələrin vətəndaşları aspiranturaya müvafiq qaydalarla qəbul olunurlar.

3. Aspiranturaya daxil olmaq üçün qəbul imtahanlarında birinci bəndin şərtlərini ödəyən aşağıdakı şəxslər iştirak edə bilərlər:

- bilavasitə ali məktəbi fərqlənmə diplomu ilə bitirən və ya aspiranturaya qəbul olunmaq üçün fakültə Elmi şurasının zəmanəti olan məzunlar;
- seçdikləri ixtisasın profili üzrə bir qayda olaraq azı iki il iş stajına malik olan şəxslər.

4. Ali təhsil müəssisələrinin qiyabi və axşam şöbələrinin məzunları seçdikləri elmi ixtisasın profili üzrə ən azı iki il praktiki iş stajına malik olduqda aspiranturaya qəbul imtahanlarına bilavasitə ali məktəbi qurtardıqdan sonra ali məktəb (fakültə) Elmi şurasının zəmanəti ilə burxaxıla bilərlər.

5. Aspiranturanın tam kursunu bitirmiş şəxslər təkrarən aspiranturaya qəbul edilmirlər.

Assistentura-stajorluğun tam kursunu bitirmiş şəxslər ödənişli əsaslarla aspiranturaya qəbul oluna bilərlər.

6. Aspiranturaya qəbul haqqında ərizə, ali təhsil (elmi-tədqiqat) müəssisəsi rektorunun (direktorunun) adına yazılır. Ərizəyə aşığıdakı sənədlər əlavə olunur:
- kadrların şəxsi qeydiyyat vərəqəsi;
- tərcümeyi-hal;
-  4 fotoşəkil (3 X 4 ölçüdə);
-  çap olunmuş elmi əsərlərin, ixtiraların və elmi-tədqiqat işləri üzrə hesabatların siyahısı, yaxud referat (seçdiyi ixtisas üzrə);
-   əmək kitabçasından çıxarış (işləyənlər üçün);
-  ali təhsil haqqında diplomun surəti və diploma əlavə (qiymət cədvəlindən çıxarış);
-  aspiranturaya qəbul olunmaq üçün Elmi şuranın zəmanəti.

Diplomun əsli və pasport şəxsən təqdim edilir.

7.. Aspiranturaya sənədlərin qəbulu müvafiq ali təhsil (elmi-tədqiqat) müəssisələri tərəfindən aparılır. Həmin müəssisələrdə yaradılmış qəbul komissiyası daxil olmuş sənədlərin ilkin təhlilini və aspiranturaya sənəd verənlərin nəzərdə tutulan elmi rəhbərlərlə görüşləri təşkil edir.

8. Qəbul komissiyası aspiranturaya ilk qəbul imtahanının başlanmasınaı ən azı 5 gün qalmış sənədləri araşdırır, imtahanlara buraxılanlar haqqında qərar qəbul edir və bu halda onlara məlumat verir.

9. Aspiranturaya qəbul imtahanlarına buraxılmış şəxslərə (hazırlaşmaq və imtahanları vermək məqsədi ilə) Azərbaycan Respublikası Əmək Məcəlləsi 122-ci maddəsinin 3-cü bəndinə əsasən onların iş yerindən 30 təqvim gününədək (hər imtahan üçün 10 gün) ödənişli məzuniyyət verilir. 

10. Aspiranturaya qəbul üçün sənəd verən, lakin qəbul komissiyasının qərarına görə qəbul olmayan şəxslərə komissiyanın əsaslandırılmış cavabı verilir.

Komissiyanın qərarı ilə razı olmayan şəxslər 2 gün müddətində komissiyanın sədrinə yazılı şəkildə müraciət edə bilərlər.

11. Aspiranturaya qəbul olunmaq istəyənlər ixtisas fənnindən, fəlsəfədən və xarici dillərin (ingilis, alman, fransız və ərəb) birindən ali məktəblər üçün qüvvədə olan tədris proqramları həcmində qəbul imtahanları verirlər.

12. Bütün fənlərdən qəbul imtahanları müvafiq ali təhsil (elmi-tədqiqat) müəssisəsində yaradılmış imtahan komissiyaları tərəfindən keçirilir.

13. Aspiranturaya qəbul imtahanları təsdiq edilmiş cədvələ müvafiq qaydada (suallar üzrə cavab qeydləri xüsusi vərəqlərdə aparılır və protokolla birlikdə gələcək aspirantın şəxsi işində saxlanılır, qəbul olunmuş şəxslərin imtahan vərəqləri və protokollar bir il müddətində ali məktəbin (elmi-tədqiqat institutunun) aspirantura şöbəsində saxlanılır) mövcud proqramlara uyğun tərtib edilmiş biletlər üzrə aparılır.

14. Hər imtahan başa çatdıqdan sonra onun nəticəsi elan edilir. Birinci imtahandan (ixtisas fənnindən) «qeyri-kafi» və ya «kafi» qiymət alan şəxslər digər imtahanlara buraxılmırlar. İmtahanların təkrar verilməsi qadağandır.

Qəbul imtahanlarında bərabər ballar toplandıqda, ixtisas fənnindən daha yüksək qiymət alan, ixtisas fənnindən də bərabər bal toplandıqda isə çap edilmiş elmi əsərləri və ya seçdiyi ixtisas üzrə azı bir il stajı olan şəxslərə müsabiqədə üstünlük verilir.

15. Aspiranturaya qəbul haqqında qərar təsdiq edilmiş plana uyğun qəbul komissiyası tərəfindən çıxarılır və rektorun (direktorun) əmri ilə rəsmiləşdirildikdən sonra qüvvəyə minir.

16. Qəbul imtahanlarını müvəffəqiyyətlə vermiş, lakin müsabiqədən keçməmiş şəxslər Təhsil Nazirliyinin razılığı ilə ödənişli əsaslarla aspiranturaya qəbul oluna bilərlər.

17. Aspiranturaya qəbul imtahanları qurtardıqdan sonra ali təhsil (elmi-tədqiqat) müəssisəsi 10 gün müddətində Təhsil Nazirliyinə qəbulun yekunları haqqında hesabat və qəbul olunmuş şəxslər haqqında məlumat göndərir.